Synnyinrannale

Minun armas Synnyinrandu

Minun armas Synnyinrandu,

vuvvet, sugupolvet mennäh,

sa ku tähti-tulihändy,

lennä korgial, ainos lennä!

Minun armas Synnyinrandu,

käske vai, ga siirdyy vuori.

Tuatat aluskivet pandih,

seinät nostau polvi nuori.

Minun armas Synnyinrandu,

mibo meile tuuli viilei?

Nuori syväin - kiingei jänneh.

Nuori mieli - ravei piili.

Minun armas Synnyinrandu,

nouskah vaiku hyvyön ido.

Anna rauhan puolištandu

voinan kobrat lujem sidou.

Minun armas Synnyinrandu,

sinun kibei - sinun abei

meile ailahannu andah,

menöy syväinkeräs läbi.

Minun armas Synnyinrandu,

usko, sanottu on tozi:

sinus tuači hengi andua,

suurembua ei ole ozua.

Vladimir Brendojev